قصيدة (خالد المتصاعد) للشاعر عبدالله جلسه – فيديو

الشاعر: عبدالله بن جلسه

ألقيت مساء الجمعة 13 شوال 1446هـ في حفل تقاعد أخيه الشاعر خالد بن جلسه – جدة

كنت أنا وأعتى شياطين القصايد شله

لا بغينا الشعر يتزهّل به أطرف واحد

.

وكنت اجيب المارد الملعون وآسوّل له

لين اطلع لي قصيده من عيون المارد

.

ويوم أنا روحي من امطار الشعر مبتله

والله ماكنت أحسد الشيخي وعبدالواحد

.

والحقيقه صار لي فتره بديت آمله

مدري إحساسي نضب والا شعوري جاحد

.

لين قالو حفل خالد قلت خالد كله ؟

ليش طيب ؟ قالو أصبح من شهر متقاعد

.

قلت لا والله ما يقعد وانا عبدالله

غيروها، واكتبوها خالد المتصاعد

.

بعدها أعطوني دقيقة صوت لين اوصل له

او دقيقة صمت حسب الاعتقاد السايد

.

مثل خالد لا يجي، يرسل علينا ضله

ونحتفل بالظل نحسب صاحبه متواجد

.

سيفي اللي لا تحدتني الصعاب آسلّه

وساعدي لا جارت أيامي ونعم الساعد

.

مثل ما صب المراجل في عيون الذله

صب له تقدير حتى في عيون الحاسد

.

اشتكي من كثرته جنبي ماهو من قله

لا وقف جنبي لوحده صار حولي واجد

.

كل ما ضاقت علي، جبت التمر والدلّه

والعن الشيطان واتقهوى ودمي بارد

.

ادري ان اكبر همومي عند خالد حله

ما تصاغرت الحروب إلا ثقه في القايد

.

وكل ماتفاخر بكبر إسمي وانا عبدالله

لا بغيته يكبر أكثر قلت أنا اخو خالد

.